Hinnerk kreeg annerletzt vun sien Fru Annalena den Opdrag, Fisch to halen. Wat Hinnerk dorbi an Fisch köpen schull, dat schull he sülfst maal sehn, wenn he bi 'n Fischkoopmann weer. "Kiek man maal, wat de Hering kösten doot!" geev Annalena ehrn Hinnerk bloot mit op den Weg. Hinnerk, de vun siene Kinnertiet an veel un geern Hering in all de ünnerscheedlichen Formen eten hett, as man den Hering trechtmaken kann un deit: Braden Hering, in Suur leggt, as Bismarck Hering, as Rollmops, as Bückel, as Heringsfilee mit de ünnerscheedlichen Stippen in Dosen, in roden oder witten Heringssalaat. De Hering weer in de verleden Tieden de Karpen vun den lütten Mann (Sniederkarpen). Vergeten warrn schall ok nich Hering in suren Glibber un dorto fiene Braatkantüffeln. Un denn fehlt an düsse Stee noch de junge Hering, de fiene'Matjes'. Hier schall nu nich optellt warrn, wo man so ünnerscheedlich den fienen Mat jes eten kann. As nu Hinnerk bi sien Fischhöker ankeem un denn ok glieks na den Pries för Hering fragte, do kunn Hinnerk sien Smacht op gröne Hering gau vergeten. Sien Fischkoopmann harr för dat Kilo Hering 5,90 Mark nöömt. As Hinnerk sik op den Weg na dat Fischhuus maakt harr, harr he an siene Jungstiet dacht. He kunn sik an de groten Heringsswörme in de Havens besinnen. Mit een Ketscher un ok bloot mit de Hannen kunn man domaals in't Fröhjohr den Hering ut dat Water halen. Wenn in 't Fröh johr solke Heringsswörme op de Lüüd an de Küst tokemen, weer dat as een Wunner för de Minschen an de Küst. Wäschekörfvull trocken de Inwahners na Huus. Binah ut all de Hüüs röök dat in de Tiet na braadten Hering. Wenn man dat beleevt hett, denn mutt man wohrhaftig an de 'Spies för de Fiefdusend' ut de Bibel denken. As Hinnerk so an de Fischtheek stünn un sik entsluten schull, of he Rootboors, Makreeln, Schollen, Dösch oder Hering köpen schull, do füll Hinnerk noch wat ut siene Jungstiet in. Hinnerk föhlte sik op eenmaal trüchversett in dat Johr 1950. Hinnerk güng domaals noch to School. Männigmaal kreeg Hinnerk vun sien Modder een Mark mit to School, ehrder he loosgüng. Modder Liese seggte denn: "Wenn du vun School kümmst, bring dree Pund Hering vun den Wekenmarkt mit!" Hinnerk nehm sik denn een Inkööp Nett mit. Op den Trüchweg köffte Hinnerk denn de dree Pund Hering in. To Huus ankamen, güng de Modder glieks dorbi, nehm de Hering ut, dreihte se in Mehl üm un geev de Fisch in de hitte Pann. De Vadder, Hinnerk un sien Modder harrn ehr Festeten mit Kantüffelsalaat. Wenn denn noch wat över bleev vun de dree Pund Hering, keem de Rest in Suur. Un ok de braadten Hering in Suur hebbt annerdaags mit Braatkanfüffeln wunnerboor smeckt. De Fischkoopmann weer so bi lütten nervöös wurrn, denn Hinnerk kunn sik ogenschienlich nich entsluten, un he fragte Hinnerk: "Wat schall dat denn sien?" Hinnerk weer lever ruutlopen, doch ohn Fisch kunn he jo nich wedder an 't Huus kamen. So leet he sik veer Stück Hering inpacken. Jo, so is dat mit den Fisch in de Tieden: Fröher hett man düchtig Fisch eten, wieldat Fisch so een priesweert Eten weer. Hüdigendaags is Fisch knapp un besünners düür, aver doch so gesund, so dat man an den gesunden Fisch nich vörbigahn kann.
dat war nur ne geschicht
dat war nur ne geschicht
mfg wikinger 
